Во Библиотеката на градот Белград одржана е промоција на збирката „Срма за Ацо Шопов“ на здружението „Македониум“ од Белград. Книгата е збирка на песни и есеи на македонски и српски јазик, инспирирани од ликот и делото на македонскиот поет и еден од основоположниците на современата македонска поезија Ацо Шопов. Песните и есеите пристигнале на литературниот конкурс кој Здружението „Македониум“ го распиша на Меѓународниот ден на мајчиниот јазик – 21 Февруари, а по повод 100-годишнината од раѓањето на Ацо Шопов и 15-годишнината од основањето на здружението. На конкурсот пристигнаа преку 200 песни и десетина есеи, од речиси 90 автори од целиот регион: Србија, Македонија, Босна и Херцеговина, Хрватска, Црна Гора и Словенија.
И насловната страница е авторско дело на сликарката Елизабета Јорданоски, инспирирана од поетската збирка „Небиднина“ на Ацо Шопов. Рецензенти на книгата се Гордана Влајиќ, заменик претседател на Друштвото на писателите на Србија и Христо Петрески, претседател на Друштвото на писателите на Македонија. Во преводот и препевот на песните се вклучија и неколку членови на здружението, додека лектурата ја изврши Зорица Лазаревиќ.
СРМА е кратенка од СРбија и МАкедонија, поточно на СРпскиот и Македонски јазик на кој што е подготвена книгата, а во тие четири букви има многу симболика на заедништво, сплотеност, позитивност, љубов и убавина, како што е впрочем убава и нежна срмата.
На промоцијата присуствуваа бројните автори застапени во книгата од цела Србија, кои ги читаа своите песни на српски јазик, додека актерите Зоран Митровиќ и Алексеј Јорданоски ги читаа препевите на македонски јазик. Секој присутен автор, покрај примерок на книга, доби и благодарница за учество во проектот.
- Иако Ацо Шопов е еден од најголемите македонски поети и втемелувачите на современата македонска поезија, навистина не очекувавме ваков голем одзив, посебно кај авторите во Србија каде што неговото творештво е и денес многу актуелно. Таа актуелност ја согледуваме кај поголемиот број на авторите во оваа збирка, кои во своите творби користеа бројни цитати од неговите дела или пак изјави од пред 60 или 70 години – истакна Зорица Митровиќ претседателка на здружението и автор на овој проект. – Во збирката не влегоа само оние песни и творби, на кои не можевме да најдеме ни најмала врска со Ацо Шопов и неговото творештво, или се посветени и инспирирани од други личности и настани. Нашето здружение и понатаму ќе се труди и стреми да влијае и придонесува во афирмацијата на македонското културно наследство на национален и меѓунационален план, преку вакви и слични проекти.
Збирката е издадена со помош и поддршка на македонските министерства за култура и за надворешни работи, српското министерство за човекови и малцински права и општествен дијалог, Покраинскиот секретаријат за култура, информирање и односи со верските заедници, како и Македонскиот национален совет во Србија.
Планирана е и промоција во Скопје.
