Синиша Новески, познат и признат светски и европски, а пред се македонски скулптор, во изминатиот период доби две награди за своето творештво во Скопје.
Наградата за најдобро вајарско дело „Семејство откорнати“ изработена во бронза ја доби на „Годишната изложба“ 2022 во Скопје, која ја доделува Друштвото на ликовните уметници на Македонија.
Наградата „Константин Мазев – Коце“, која што ја доделува Културно информативниот центар во Скопје, му беше доделена на Новески на изложбата „Уметничко творештво од мал формат“ за скулптурата ,,Липсан”. Изложбата „Мал формат“ ја организира Друштвото на ликовни уметници на Македонија. На неа учествуваат 40 уметници со 55 дела, работени во различни медиуми (сликарство, скулптура, графика, цртеж, колаж, објекти и нови медиуми).
– За мене е многу важно што ги добив овие две награди, заради тоа што 15 години бев отсутен од ликовната сцена во Македонија. Се радувам премногу што културните здруженија, институци и ликовната публика го препознаа мојот естетски квалитет во скулптурите. Ова е голем мотив за мене да продолжам да работам во моето скулпторско творештво – вели Новески.
Синиша Новески е скулптор и магистер на ликовната уметност. Од неодамна живее и твори во Скопје. Од неговите раце создадена е и скулптурата „Мајка Македонија“, која во форма на споменик треба да биде поставена во Панчево.
