Младен Србиновиќ е роден во 1925 година во селото Сушица кај Гостивар. Основно училиште и гимназија завршил во Белград. Студирал сликарство на Академијата за ликовни уметности во Белград од 1947 до 1951 година, а постдипломските студии ги завршил во 1953 година. За асистент на Академијата за ликовни уметности е избран во 1953 година, кога е избран и за член на УЛУС. Се пензионира како редовен професор на Факултетот за ликовни уметности во Белград, во 1988 година.
Првпат изложува во 1948 година на Изложбата на дела на студентите на Академијата за ликовни уметности, а самостојно во 1952 година на Графичкиот колектив. Покрај многуте индивидуални и групни изложби во земјата и странство, тој ја претставуваше југословенската уметност на многубројни изложби. Беше член на Графичкиот колектив и на Независната група (од 1952 година), и еден од основачите и членовите на Декемвриската група (1955). Објавил две графички карти (1953 и 1955), инспирирани од стиховите на Лорка. Заедно со сликарството и графиката, од 1960 година започнува со изработка на мозаици и шаблони за таписерии, кои се реализираат и изложуваат.
Неговите мозаици:
- ѕидот во свечената сала на Сојузниот извршен совет (1962) сегашна палата Србија;
- два циклуса ѕидни мозаици (1971 и 1988 година) и 17 подни мозаици (1985 година), и витраж во свечената сала на градското собрание на Крушевац;
- ѕидни мозаици во Медицинскиот центар Гамзиградска бања (1975);
- мозаичната композиција во свечената сала на фабриката „Први мај“ во Пирот (1978 година, уништена од пожар во 1992 година);
- два мозаици во зградата на белградската радио-телевизија во Кошутњак (1979);
- два мозаици за црквата Св. Никола во Рума (1985);
- мозаик на фасадата на Инвестбанка во Белград – Теразије (1989);
- мозаични икони за олтарната преграда во манастирот Жича (1993).
Во 1981 година е избран за дописен член, а во 1988 година за редовен член на Српската академија на науките и уметностите, а во 1997 година е избран за член на Македонската академија на науките и уметностите.
Добитник е на бројни југословенски и меѓународни награди.
