Со длабока тага и почит, македонската заедница во Србија се простува од Ѓорѓе Крстов од Гудурица – еден од основачите на здружението „Вардар“ од Вршац, истакнат активист, голем пријател на заедницата, но и човек кој остави неизбришлива трага во винската традиција на овој крај.
Ѓорѓе Крстов беше повеќе од активист – тој беше визионер кој знаеше да ги спои традицијата, културата и современото живеење. Како долгогодишен виноградар и енолог, тој важи за пионер на винскиот туризам не само во Вршац, туку и во Србија.
Со отворањето на својот вински подрум во Велики Средиште, а подоцна и во родната Гудурица, Крстов постави темели на развојот на винскиот туризам во регионот, враќајќи го сјајот на вековната традиција на лозарството и винарството.
Неговата визија придонесе и за создавање на познатата туристичка рута „Патиштата на виното“, со што Вршац и околината станаа препознатливи на винската мапа.
Но, покрај неговото значајно професионално дело, Крстов ќе остане запаметен и како човек кој инспирираше многумина – како во винската уметност, така и во заедничкото делување. Беше еден од оние луѓе кои со својата тивка, но истрајна работа ги поттикнуваа другите да се вклучат, да создаваат и да го негуваат она што ни е заедничко.
Како еден од основачите на здружението „Вардар“ Вршац, неговата улога во организирањето и обединувањето на македонската заедница беше од особено значење. Неговата посветеност, искреност и човечка топлина оставија длабока трага кај сите што го познаваа.
Заминувањето на Ѓорѓе Крстов претставува голема загуба – не само за македонската заедница, туку и за културниот и винскиот живот на целиот регион.
Неговото дело продолжува да живее – во лозјата, во подрумите, во спомените на луѓето, но и во секоја иницијатива што го негува македонскиот јазик, култура и идентитет.
Нека му е вечна слава и благодарност.
