Неодамна во Белград, во културниот центар „Тикарк“, беше одржан промотивен настан по повод јубилејната сезона на „Астерфест“.
Беа претставени најновите печатени изданија на астерфестовската филмолошка едиција „Словенски Орфеј“, а беше прикажан и визуелниот идентитет на 20-то издание. Воедно се зборуваше за значењето на јужнословенската кинематографија и за регионалните авторски и институционални субјекти кои оставиле траги низ двете децении на овој македонски фестивал, како и за улогата на основачите, авторите и лауреатите на „Астерфест“ во поширокиот балкански културолошки контекст.
Модератор на вечерта беше претседателот на Здружението на драмските писатели на Србија и филмски советник Зоран Стефановиќ, кој го водеше и разговорот со директорот на „Астерфест“ д-р Горан Тренчовски. Дел од настанот беа и неколкумина видни белградски пријатели од академската заедница. Се разви и панел-дискусија која беше базирана врз личните искуства и практики на присутните: Саша Радојевиќ (филмски критичар и автор), проф. д-р Снежана Трстењак (втемелувач на анимацијата во образованието), Владимир Ѓуриќ (мултимедијален автор), проф. д-р Петар Грујичиќ (писател и критичар), Жељко Јовановиќ (уметнички фотограф) и Тихомир Стоиљковиќ (композитор).
Астерфест е меѓународен филмски фестивал кој што започна да се одржува од 2005 година во Струмица. Фестивалот има натпреварувачки карактер. На фестивалот се доделуваат наградите: Златна, Сребрена и Бронзена потковица, Старозлатен проектор, Наградата за најдобар автор „Ацо Алексов“, Наградата за најдобро сценарио „Ѓорѓи Абаџиев“, како и други награди за најдобрите филмови. Покрај овие награди, се доделуваат и почесната Награда за високи достигнувања во областа на филмот „Астер“ и други специјални награди. Во официјалната компетиција на фестивалот земаат учество професионални филмски автори и продукции од цел свет, а се прикажуваат кусометражни и долгометражни содржини. Фестивалот се одржува секоја година и е поддржан од Општина Струмица и Агенцијата за филм. Уметнички директор на Астерфест е основачот на фестивалот Горан Тренчовски. Астерфест прерасна во значајна филмска манифестација посветена на краткометражниот филм не само во Македонија, туку и во регионот.
