По подолг период без ваков вид на директна комуникација, во Пландиште се одржа првата заедничка средба на македонската заедница со Македонскиот национален совет – настан што отвори ново поглавје во градењето на доверба, единство и заедничка визија.
Во Културно-образовниот центар во Пландиште, во организација на здружението „Македонски бисери“, беше реализирана презентација на Стратегијата на Националниот совет на македонската национална малцинство за периодот 2026–2031 година. Стратегијата ја претстави претседателката на Советот, Зорица Митровиќ, која ги запозна присутните со клучните приоритети, цели и насоки за развој на македонската заедница.
Настанот се одвиваше во исклучително отворена и конструктивна атмосфера. Во рамките на дебатата се направи осврт на состојбите од минатото, при што јасно беше истакнато дека поделбите не придонеле за унапредување на позицијата на македонската заедница – напротив, тие ја ослабнале нејзината видливост и влијание.
Токму затоа, Пландиште се наметна како позитивен пример дека сплотеноста и заедничкото делување носат конкретни резултати. Во дискусијата беше нагласено дека идниот напредок мора да се темели на координиран и инклузивен пристап, во кој секој поединец и организација има своја улога.
Стратегијата беше препознаена како важен инструмент за обединување – платформа што ги поставува темелите за посилна, поорганизирана и повидлива македонска заедница во Србија. Средбата во Пландиште на тој начин испрати силна порака: дека единството не е само идеја, туку неопходен предуслов за напредок.
