Тимот на Здружението на Македонци Вардар Ниш постигна значаен успех на гастрономскиот настан ,,Залогај југа” кој се одржа во Видриште.
Настанот, организиран од Здружение на вработени во угостителството и туризмот Ниш, собра бројни учесници и љубители на традиционалната кујна. Во силна конкуренција, тимот на „Вардар“ го освои првото место и златниот медал во подготовка на јадења во котел на отворен оган, со традиционален грав подготвен по домашен рецепт – вкус кој потсетува на детството, дружењето и старите добри обичаи.
Овој успех не е само резултат на кулинарска вештина, туку и доказ за силата на заедништвото, посветеноста и љубовта кон традицијата. Како што истакнуваат од здружението, освоениот медал е заеднички успех – за секој член, секоја поддршка и секој што верувал во тимот.
„Вардар“ Ниш уште еднаш покажа дека не е само здружение, туку вистинско семејство кое го чува и пренесува духот на македонската традиција, градејќи пријателства и заедништво каде и да настапи.
