Денес, на 5 Мај – Денот на македонскиот јазик, оддаваме почит на еден од најсилните темели на нашиот национален и културен идентитет. На овој ден во 1945 година беше усвоена македонската азбука, а со тоа беа поставени и темелите на современиот македонски литературен јазик – историски чин од огромно значење за македонскиот народ, неговата самобитност и културен развој.
Македонскиот јазик е многу повеќе од средство за комуникација. Тој е сведоштво за нашето историско постоење, чувар на традицијата, духовноста и колективната меморија на генерации Македонци. Во него се вткаени народните песни, приказни, обичаи, книжевноста и мислата на сите оние кои низ вековите го чувале и негувале македонскиот идентитет.
Денот на македонскиот јазик е потсетник за важноста од негово зачувување, негување и афирмирање – особено меѓу младите генерации и меѓу Македонците кои живеат надвор од матичната држава. Грижата за јазикот значи грижа за сопствените корени, култура и припадност.
Во време на брзи општествени промени и глобализација, обврска на сите нас е да го чуваме македонскиот јазик жив, достоинствен и присутен во образованието, културата, медиумите и секојдневниот живот. Зашто јазикот е нашиот духовен дом, мост меѓу минатото, сегашноста и иднината.
