Претставниците од македонската агенција за иселеништво го посетија здружението на Македонците ,,Гоце Делчев” во Врање, со коешто со години негуваат успешна соработка. На средбата во канцелариите на здружението присуствуваа и претставниците од градот Врање со македонско потекло, кои даваат поддршка на здружението.
Повод за посетета овој пат беше бочварската работилница на Зоран и Роза Ѓорѓевиќ, чии бочви се користат за добивање на квалитетен барик од страна на познати винарии во регионот и пошироко. Кавадаречкото потекло на Роза Ѓорѓевиќ ја употполни оваа нивна успешна приказна.
- Најважно е да почитуваш и бидеш почитуван, горди сме на Билијана од Агенцијата, којашто е главната алка на целата наша дијаспора. Нејзините топли и емотивни зборови и даваат надеж во подобра иднина. Само сите сплотени можеме да бидеме успешни – истакна домаќинот, претседателот на здружението ,,Гоце Делчев– од Врање Пецо Ристески.
По работилницата гостите од Македонија ја посетија и книжарата ,,Ризница”, којашто е вистинска ризница на литература во Врање.
