Крајот на месец декември е време кога се повлекува линија и се сумираат резултатите. Македонското здружение Вардар од Вршац на крајот на декември го одржа годишното собрание на кое беа презентирани резултатите и реализираните проекти, како и плановите за следната година.
Непосредно пред почетокот на собранието, со едноминутно молчење им се оддаде почит на починатиот претседател на Националниот совет, Борче Величковски, како и на жртвите во Нови Сад.
По завршувањето на официјалниот дел беше организирана изложба на фотографии „Стари македонски порти“ за сите присутни членови во хемиското училиште во Вршац, како и изложба на народни носии и стари предмети.
Сите присутни ги поздрави Ленка Стојановиќ, претседател на здружението Вардар од Вршац, а Стеван Србиновски зборуваше за значењето на портата, копаничарството и традицијата.
Старите македонски порти на Охрид, Вевчани, Ташмаруниште, Кратово итн. ги фотографирал Дарко Ристески – член на здружението, кој инспирацијата за оваа изложба ја добил додека патувал низ Македонија и шетал низ стариот дел на градот Охрид и околните градови.
Во културно-уметничкиот дел на програмата настапи поетесата Верица Преда Превера, поемата „Портата на моето детство“ од Живко Стојановски ја читаше Љиљана Милојевиќ, а песните „Мама кој чука на порта“ и „На порти седјаше“ ги пееја членовите на хорот на групата „Исток 10“ од Вршац.
Дружењето со песни и ора продолжи како увертира за претстојните Новогодишни и Божиќни празници.
