Во рамките на манифестацијата Денови на македонската култура во Белград ,,Допир на Македонија” во Педагошкиот музеј во Белград одржана е промоција на новата збирка на поезија „Per Aspera Ad Astra“ (позната латинска изрека, која се преведува како „Преку трње до ѕвездите“ ) на Оливера Доцевска. Присутните ги поздрави претседателката на здружението ,,Македониум” Зорица Митровиќ. Претставувајќи ја поетесата и нејзината биографија, таа истакна задоволство од соработката и надеж за нејзиното продолжување и проширување, бидејќи поетесата од неодамна живее и работи во Белград.
За нajновата збирка зборуваше поетесата Искра Пенева. Таа препеа и неколку песни од македонски на српски јазик, така да присутните имаа прилика да ја слушнат поезијата на двата јазика. Претставувајќи го творештвото на Оливера Доцевска, Пенева го истакна и нејзиниот широк опсег на професионални дејствувања, од адвокатура, борба за човекови права, борба против сиромаштија, дипломатија, како и нејзиното суптилно авторство, како поетеса, хуманист, еволуционист, есеист, колумнист, приредувач, преведувач и уредник на нејзиниот портал budnost.mk. Нејзиното книжевно творештво опфаќа повеќе дела поезија и проза, меѓу другото осум стихозбирки, три приредени антологии, како и колумни, есеи, преводи. Преведена е на повеќе јазици и добитник на неколку награди за поезија.
Авторката истакна дека новата книга е зборник на необјавени песни, песни кои низ душевната призма ги рефлектира изминатите години и општествениот и личниот пат, проткаен со животите на другиот, прикажување на смислата во бесмислата и на губењето низ себепронаоѓањето, низ силата на мислата и на зборот во одбраниот пат и правец.
Бидејќи ова е прв пат да и се претставува на белградската публика, иако нејзината прва збирка на поезија “Илузија за сон” е издадена токму во Белград, прочитани се и неколку песни од другите нејзини збирки. Најголемо внимание предизвика несекојдневната љубовна поема „Естер Ихаз“ делото чие име е извадено од Унгарската благородничка фамилија Естерхази, некаде во Средниот век, а зборува за безвременската љубов на принцезата Естер Ихаз и воинот Зеид Арман и нивните вљубени души кои низ вековите се реинкарнираат и повторно се среќаваат.
