Во организација на драмската секција на здружението ,,Вардар”’од Вршац подготвена е и премиерно изведена театарската претстава ,,Со кајче низ Македонија” во преполната сала на Културниот центар на Вршац. Анѓелија Стојановиќ и Дарко Ристески кои што ја водат драмската секција, го потпишуваат сценариото, работеа на режијата и покрај децата ги играат главните улоги во претставата, која што е осмислена двојазично, на српски и македонски јазик.
Идејата потекна од здружението и претседателката Весна Мицевска Антал, со цел да се анимираат младите и најмладите и да се вклучат во работата на здружението, но и да на овој начин се запознаат со македонскиот јазик, културата и традицијата. Драмската секција започна со работа пред само неколку месеци и за сега брои десетина деца, кои се вклучени во претставата и успешно ја реализираа задачата да научат песни за градовите низ кои што плови кајчето. На децата кои што се со македонско потекло и кои во училиштето го учат македонскиот јазик како изборен предмет им беше полесно, но и сите заедно се потрудија да го совладаат текстот беспрекорно.
- После сите овие години активизам и учество во разни проекти и во моето здружение и во соработка со другите здруженија и јас сам како поединец и музичар, можам да кажам дека најмногу се гордеам со овој проект и многу сум среќен што успеавме да го реализираме. Сметам дека неговата реализација е од голем значај, не само за Вршац туку и за целата македонска заедница во Србија, бидејќи е наменет за најмладите кои врз забава, игра, дружење, глума имаат можност да го слушнат и научат македонскиот јазик на најлесен и најубав начин – истакнува Дарко Ристески.
Тој се надева дека тоа ќе го препознаат и вреднуваат институциите кои што овозможуваат реализација на вакви проекти, за да може ,,македонското кајче” да ги посети и сите македонски здруженија во Србија.
Во претставата тој го толкува ликот на чичко Гоце, кој е стар неколку века и на интерактивен начин раскажува приказни и анегдоти интересни и за децата но и за возрасните. Тој најдобро ја познава македонската историја, бидејќи лично присуствувал на некои од настаните заедно со своите роднини со кои ги изградија Стоби и Кокино, меѓу кои е и Билјана што белеше платно на охридските извори, каде што за прв пат ја пуштил пастрмката во езерото, но и за неговата прва љубов Јовка Кумановка.
Неговата колешка Анѓелија е просветен работник и има искуство во работа со деца, што овој проект го поедностави и направи покреативен. Таа и во претставата има улога на учителка Калина, која што ги запознава децата со убавините на Македонија.
- Најголемата награда за сите нас е полната сала во културниот центар, аплаузите и позитивните реакции на публиката. Се надеваме дека претставата во текот на наредната година ќе биде играна и во другите места, а желбата на сите нас е да ја изведеме и во Македонија – истакнуваат организаторите.
По премиерата, на сите деца кои што беа присутни во салата и интерактивно се вклучуваа во претставата им беа поделени новогодишни пакетчиња обезбедени од здружението ,,Вардар” од Вршац.
