По повод одбележувањето на Меѓународниот ден на човековите права – 10 декември, во просториите на Народниот музеј во Белград се одржа свечена академија во организација на Министерството за човекови и малцински права и општествен дијалог. Настанот беше посветен на промоцијата и заштитата на човековите права, како и на унапредувањето на еднаквоста, толеранцијата и меѓусебното почитување во мултиетничкото општество на Република Србија.
На свеченоста присуствуваа бројни претставници на државните институции, националните совети на националните малцинства, граѓанскиот сектор, како и претставници на меѓународни организации. Меѓу присутните беше и претседателката на Македонскиот национален совет, Зорица Митровиќ, која заедно со своите колеги од другите национални совети ја изрази поддршката за континуираните напори насочени кон зајакнување на човековите и малцинските права и развојот на меѓуетничкиот дијалог во Србија.
Во рамките на свечената академија беа упатени пораки за значењето на Универзалната декларација за човековите права и нејзината примена во современото општество, како и за потребата од постојано унапредување на правната рамка и практиките кои гарантираат еднакви можности за сите граѓани, без разлика на нивната национална, верска или друга припадност.
Присуството на претставниците на националните малцинства, меѓу кои и Македонскиот национален совет, претставува јасен показател за заедничката определба за градење општество засновано на почитување на човековото достоинство, дијалог и соработка. Настанот уште еднаш ја потврди важноста на институционалната поддршка и партнерството меѓу државните органи и националните заедници во процесот на унапредување на човековите права во Србија.
