Во Основното училиште „Моша Пијаде“ во Гудурица се одржа уште една креативна работилница за учениците кои го изучуваат Македонскиот јазик со елементи на национална култура. Работилницата ја реализираше поетесата и новинарка Искра Пенева, која со децата истражуваше како зборовите стануваат приказна, песна, интервју или репортажа.
Децата создаваа оригинални плакати за работилниците, на кои со своја имагинација и многу боја ги претставија темите „музичка“, „ликовна“ и „новинарско–литературна“ работилница. Со радост, симболи, цртежи и пораки тие покажаа дека јазикот не е само предмет – туку простор за дружба, креативност и култура.
Секретарот на Советот, Марјан Јованоски, на учениците им подели учебници по Македонски јазик за прво, второ и трето одделение, како поддршка за нивната настава и ученичка љубопитност.
Активноста е дел од програмата за промовирање на македонскиот јазик и националната култура во училиштата во Србија, која Советот ја спроведува со посебно внимание и поддршка.
