Солистичкиот концерт на млада и успешна виолинистка Вероника Мона Богиќ, со клавирска придружба на Катарина Хаџи-Антиќ, ја затвори изложбата „Линија на световите” на Ана Илијоска Богиќ на 25 март 2025 година во земунската галерија Нар. На програмата беа дела за виолина од познати класични композитори Бетовен, Равел, Паганини и Бравничар.
Вероника Мона Богиќ е родена во 2004 година во Белград. Основното и средното музичко образование го завршила во ДМУ „Коста Манојловиќ” во класата на професорката Ана Илијоска Богиќ. Дипломирала на ФМУ во Белград во класата на проф. Маја Јокановиќ, а моментално е на магистерски студии во класата на проф. Марко Јосифоски. На 11тогодишна возраст ја започнува својата прва турнеја на солистички концерти, кои се одржани во Белград, Чачак, Ваљево, Мостар, Сплит, Макарска, Трст, Копар, Пиран, Изола, Сежана, Нова Горица итн., а оттогаш настапувала во Франција, Белгија, Италија, Швајцарија, Австрија, Украина, Словенија, Хрватска, Македонија, БиХ, Црна Гора…
Добитничка е на многубројни први награди на меѓународни натпревари, од кои се издвојуваат: Лауреат на натпреварот „Arthur Grumiaux” 2015 (Намур, Белгија), лауреат и апсолутен победник во сите категории на натпреварот „Охридски бисер” 2016 (Охрид, Македонија), лауреат на натпреварот „Антонио Салиери” 2019 (Лењаго, Италија), наградата „Ѓузепе Мањани” за виртуозност, две специјални награди за впечатливост и темпераментна изведба на „Родолфо Липицер” 2023 (Горица, Италија), наградата на здружението „Византија” за исклучителни постигнувања во областа на уметноста, како и Доситеевата награда за постигнати резултати на натпреварите…
