Во Палата Србија денес се одржа седница на Советот за национални малцинства, на која присуствуваше и претседателката на Македонскиот национален совет, Зорица Митровиќ.
На седницата беа разгледани клучни прашања поврзани со унапредувањето на правата и положбата на националните заедници во Република Србија, со акцент на понатамошниот институционален развој и поддршка.
Како еден од најзначајните заклучоци, беше усвоен предлогот за доделување средства од Буџетскиот фонд за национални малцинства за 2026 година, во вкупен износ од 30 милиони динари. Во рамките на распределбата, културата е утврдена како приоритетна област, што дополнително ја нагласува важноста на културниот развој и зачувувањето на идентитетот на националните заедници.
Присуството на претставниците на националните совети, меѓу кои и Македонскиот национален совет, ја потврдува нивната активна улога во креирањето на јавните политики во оваа област.
Македонскиот национален совет останува посветен на активното учество во институционалниот дијалог и на континуираното унапредување на правата, идентитетот и културниот развој на македонската заедница во Србија.
