На 22 март 2025 година, во организација на Националниот совет на македонското национално малцинство во Србија, во Домот на култура ,,Кочо Рацин” во Јабука одржана е програма во знак на сеќавање на Борче Величковски, по повод првата годишнина од неговото упокојување.
Во рамките на настанот, покрај обраќањата на неколку негови соработници и пријатели кои говореа за неговиот живот и дело, постигнувањата, успесите и трагата која ја остави во рамките на македонската заедница во Србија, беше промовирана и неговата последна книга – поезија посветена на неговата сопруга „Сонет за Адела“.
Покрај неговата сопруга, двете сестри и членовите на неговото потесно и пошироко семејство, програмата ја проследија и членовите на Македонскиот национален совет и голем број припадници на македонската заедница во Јабука.
