Претставена кандидатурата на Васил Стерјовски за пратеник во Собранието на Албанија

Престојните парламентарни избори во Албанија ќе се одржат на 11 мај годинава. Единствената Македонска партија во Албанија – Македонска алијанса за европска интеграција, на 5 март годинава објави дека, во 12-те изборни единици ќе настапи во коалиција со Демократската партија на поранешниот албански премиер и екс претседател на државата Сали Бериша во коалиција под името “Алијанса за величествена Албанија” со 26 политички партии, меѓу кои и Партијата на слободата на Илир Мета, Републиканската партија на Фатмир Медиу, Партијата за заштита на човековите права на грчкото малцинство на Вангел Дуле, како и Партијата за правда, интеграција и единство – партија на Чамите на Шпетим Идризи.

На последните парламентарни избори, Македонската партија беше во коалиција со Социјалистичката партија на Еди Рама.

Меѓутоа, незадоволни од договорот, бидејќи Демокатската партија не обезбеди ниту едно пратеничко место за Македонската партија во Албанија, ниту во изборната единица во Корча, на 12 март годинава, единствената Македонска партија во Албанија објави дека на престојните парламентарни избори повторно ќе настапи со заедничка листа со владеачката Социјалистичка партија на актуелниот премиер Еди Рама. Поради неисполнување на дадените гаранции Македонската алијанса за европска интеграција поднесе барање до Централната изборна комисија да биде избришана од изборната коалиција со Демократската партија на Сали Бериша.

• По разговорите што ги имавме со претставници на партијата, договорен е заеднички настап на изборите со социјалистите, откако добивме гаранција дека на отворените листи, пред сè на онаа во изборна единица Корча, ќе имаме наши кандидати. Договорот го потпишав јас во име на нашата партија и Нико Пелеши, координатор на пратеничката група на Социјалистичката партија, – потврди Ендрит Фетаху, потпретседател на Македонската алијанса за европска интеграција.

Според него, во потпишаниот договор стои дека Македонска алијанса за европска интеграција има право да предлага свои претставници за политички функции на централно и локално ниво, во согласност со договорот и принципите на соработка.

• Во Корча, нашата партија има право да предложи кандидат на отворената листа на Социјалистичката партија за парламентарните избори на 11 мај 2025 година. Партијата Македонска алијанса за европска интеграција е посветена на поддршка на Социјалистичката партија во сите региони на Албанија, придонесувајќи за зголемување на изборната поддршка и заедничка победа на коалицијата, – според Ендрит Фетаху, стои во договорот.

Исто така, посебна одредба во договорот е обврската на Социјалистичката партија за подобрување на условите за живот и работа во повеќе области на македонското малцинство.

• Социјалистичката партија на Албанија е посветена на поддршка и гарантирање на правата на македонското малцинство во Албанија, во согласност со меѓународните стандарди и законските обврски на земјата. Социјалистичката партија ќе даде приоритет на инвестициите во инфраструктурата, образованието, водоснабдувањето, канализацијата и други витални сектори за развој на областите со македонско население, како што се Преспа, Голо Брдо и Гора, со цел да се подобри квалитетот на животот на жителите од овие области, се обврзуваат социјалистите.

Исто така, Владата предводена од Социјалистичката партија ќе ја поддржи и унапредува наставата на македонски јазик, онаму каде што постојат потребните услови, во согласност со законската рамка што го регулира образовниот систем на Република Албанија.

• Тоа од причина што не беше испочитуван договорот наши претставници да бидат на отворените кандидатски листи на Демократската партија. Наша цел не е да бидеме само декор во некоја коалиција, туку силен политички субјект кој ќе има свој претставник во новиот албански законодавен дом, – рече Ендрит Фетаху.

Престојните парламентарни избори се единаесетти по ред од падот на комунистичкиот режим На Енвер Хоџа, ќе се одржат на 11 мај 2025 година, а на нив за првпат ќе гласаат и албанските државјани кои престојуваат во странство.

Денес, Нико Пелеши, координатор на пратеничката група на Социјалистичката партија за округот Корча и пратеник од оваа изборна единица Нико Пелеши, го претстави Васил Стерјовски, кандидат за пратеник во оваа изборна единица од Македонската алијанса за европска интеграција.

Нико Пелеши ги повика граѓаните од ова изборна единица, која ја опфаќа и општина Пустец, и други населени места со Македонци, да го поддржат Стерјовски, како “значаен глас за Македонската заедница во Албанија и посветена фигура во политичката и академската јавност“.

• Роден во Корча, студиите ги завршил по историја, а моментно е докторанд на Универзитетот “Свети Кирил и Методиј“ во Скопје. Во моментов ја продолжува својата дејност како професор на Универзитетот “Фан Ноли“ во Корча и промотор на зачувувањето на културното наследство на македонското малцинство во Албанија, наведе Нико Пелеши.

Нико Пелеши потсети дека во периодот 2019-2021 година, како пратеник и раководител на локални институции Васил Стерјовски “посветено ги бранеше правата на македонската заедница“.

• Како претседател на македонската партија, Македонска алијанса за европска интеграција тој е посветен на градење силен сојуз со Социјалистичката партија, обезбедувајќи застапеност и развој за Преспа и пошироко. И во иднина ќе продолжиме заедно да работиме за доброто на Македонците во Преспа, Голо Брдо, Гора и за целата прекрасна македонска заедница во Албанија, посочи во објавата Нико Пелеши, кој е и координатор на пратеничката група на Социјалистичката партија и поранешен министер за одбрана.

Стерјовски во трка за пратенички мандат, на изборите на 11 мај, е на отворената кандидатска листа на Социјалистичката партија за изборна единица Корча, што е една од 12-те изборни единици во земјата, каде концентрацијата на Македонците е голема, Мала Преспа, градот Корча и во други населени места.

Васил Стерјовски како лидер на Македонската алијанса за европска итеграција од 2019 година беше пратеник во претходниот парламентарен состав и е прв пратеник Македонец, кој јавно се декларираше како Македонец. На една од пленарните седници тој до пратениците се обрати на македонски јазик, што беше историско достигнување на Македонците.

Македонската партија е единствената партија во Албанија, што потпиша договор со владејачката социјалстичка партија на премиерот Еди Рама, за заеднички настап на изборите.