По тригодишна пауза, започна изработката на Акциониот план за националните малцинства
На 4 март во палатата „Србија“ се одржа состанок на работната група за изработка на предлог за Акционен план за остварување на правата на националните малцинства, на која присуствуваа повеќе од 40 членови, претставници на републичките и покраинските власти, координацијата на националните совети на националните малцинства, како и граѓанските организации. Членка на работната група е и претседателката на Македонскиот национален совет Зорица Митровиќ, која што присуствуваше на состанокот.
Присутни беа и претставниците на Делегацијата на Европската Унија, Советот на Европа, ЕЦМИ и Мисијата на ОБСЕ. Како што беше претставено на состанокот, работната група има за цел да подготви предлог за нов Акционен план за остварување на правата на националните малцинства до крајот на јуни, бидејќи стариот, усвоен во март 2016 година, истече во 2020 година.
Отворајќи ја средбата, државниот секретар проф. Д-р Рејхан Куртовиќ се заблагодари за поддршката на Канцеларијата на Советот на Европа со која, како што нагласи, имаме исклучителна соработка. Поддршката за подготовка на Акциониот план е само дел од активностите кои заеднички ги спроведуваме со цел да ги спроведеме препораките на релевантните тела на Советот на Европа, додаде тој. Овој акционен план, нагласи државниот секретар, има за цел дополнително да го подобри системот за заштита на индивидуалните и колективните права на припадниците на националните малцинства во Република Србија, во согласност со меѓународните стандарди и да ги подобри условите за поконзистентна имплементација на прописите, што ќе придонесе за поефикасно учество на припадниците на малцинствата во јавниот живот и поголема одржливост на механизмите и системските гаранции, особено во областите што ги засегаат.
Обезбедена е стручна поддршка за подготовка на финалниот Нацрт на акциониот план преку проектот „Борба против дискриминација и промовирање на различностите во Србија“, кој е дел од заедничката програма на Европската Унија и Советот на Европа.
На состанокот на работната група беше предложена методологија за понатамошна работа која подразбира работата на работната група да се организира во помали групи, односно по тематски области (култура, образование, информирање и сл.). Како што е предложено, на овие состаноци ќе бидат поканети членовите на работната група, претставници на релевантни државни органи, претставници на националните совети и граѓанските организации. Доколку при работа на одредени тематски области се појават прашања за кои се надлежни други институции, би се правеле и консултации со нив.
