На 28 мај 2025 година, во културниот простор Куќа на Ѓура Јакшиќ во српската престолнина, Здружението на граѓани од македонска националност „Македониум“ организираше поетска вечер посветена на македонската поетеса и преведувачка Емилија Тодорова, како дел од манифестацијата Денови на македонската култура во Белград ,,Допир на Македонија”.
Настанот беше вистински празник на поетската мисла и емоција. Присутните имаа ретка можност да се запознаат со животниот и творечкиот пат на Емилија Тодорова, која своето потекло го носи од Скопје, а од 1989 година живее и создава во Сиднеј, Австралија. Тодорова, која е активна во поетските кругови и на македонски и на англиски јазик, добитничка е на бројни награди и признанија како во Македонија, така и на меѓународно ниво, вклучително и Орден за општествени заслуги и Златен медал за унапредување на мултикултурните односи во Австралија.
Поетската вечер мина во знакот на силни емоции, длабоки мисли и извонредни поетски слики. Публиката уживаше во читањето на песни кои го опсервираат женскиот сензибилитет, егзистенцијалните и филозофските прашања, како и искуството на миграцијата, теми што доминираат во творештвото на Тодорова. Особено беа истакнати нејзините песни кои се осврнуваат на концептот на болката кај Шопенхауер и Ниче, со што нејзината поезија добива и длабок психолошки и интелектуален слој.
Вечерта ја модерираше Искра Пенева, која со многу суптилност и чувство успеа да ги приближи песните и личноста на Тодорова до присутните. Атмосферата беше топла, интимна и инспиративна, а присутните ја напуштија салата збогатени со едно автентично поетско доживување.
Настапија и најмладите – Катја Василева поетеса која има само 9 години, со нејзината песна „Дете“ со која што го освои второто место на „Поетски средби“, а нејзиниот хаику беше објавен во специјална збирка. Таа е членка на културни центри и секојдневно ги развива духовните вредности. Ансамблот ,,Версус” сочинет од најмладите виолинисти во класата на Ана Илијоска Богиќ, го збогатија и овој настан со своите креативни изведби.
Со овој настан, Здружението „Македониум“ уште еднаш ја потврди својата посветеност во промоцијата на македонската култура и литература во Србија, создавајќи простор за поврзување, препознавање и зачувување на македонскиот културен идентитет.
Катја Василев
Катја Василев од Белград има само 9 години, но нејзиниот талент веќе го забележаа и принцот и принцезата Караѓорѓевиќ! На 14 декември, Катја ќе ја промовира својата прва книга „Децата на светот“, исполнета со пораки за мир, љубов и пријателство.
Прекрасната љубовна приказна на нејзините родители, Србинка и Македонец, е крунисана со неа – талентирано дете кое учи, пишува, свири клавир и пее во црковен хор. Нејзините стихови ги воодушевиле публиките во Народното собрание, Палатата Србија и на натпревари низ Србија.
Катја добива признанија и награди – нејзината песна „Дете“ освои второ место на „Поетски средби“, а нејзиниот хаику беше објавен во специјална збирка. Таа е членка на културни центри и секојдневно ги развива духовните вредности.
Најважно: Катја донираше 20 книги на „Денови на македонска култура“ во Белград, а приходот ќе оди за семејствата на повредените од Кочани, кои што се лекуваат во Белград! Таа е најмлад писател во Србија и гордо ја носи својата македонска националност!
