Меѓународниот ден на жената – 8 Март здружението Македониум од Белград го одбележа со изложбата „Линии на световите” на Ана Илијоска Богиќ. Самостојната изложба на интердисциплинарната уметничка Ана Илијоска Богиќ беше отворена на 12ти март 2025 во галеријата Нар во Земун, а претставени се колажи, цртежи и објекти. Програмата е осмислена така да месец март биде посветен на жената и уметноста – музиката, поезијата и визуелното изразување. Во рамките на траењето на изложбата планирана се и два концерта – на ансамблот Версус, а солистичкиот концерт на виолинистката Вероника Мона Богиќ ќе ја затвори изложбата на 25ти март.
Нина Игњатовиќ, историчарка на уметност, свечено ја отвори изложбата забележувајќи:
– Оваа уметничка колекција претставува низа на апстрактни дела, кои преку богатството од текстури, бои и сложени структури, пренесуваат длабока симболика и емотивно напластување.
Еден од доминантните елементи во овие дела е мотивот на виолина, кој ја симболизира нераскинливата поврзаност меѓу звукот и визуелниот израз, создавајќи мост помеѓу музиката и сликарството.
‒ Изложбата „Линиите на световите” на Ана Илијоска Богиќ се занимава со пронаоѓање заеднички точки меѓу музиката, сликарството и поезијата, истражувајќи како овие три уметности се надополнуваат и збогатуваат. На изложените колажи, објекти и цртежи доминантно е преплетувањето на линиите во сликарството и поезијата, создавајќи богато искуство за набљудувачот. Преку своите дела Илијоска Богиќ создава уникатни визуелни и звучни пејзажи кои ја отсликуваат нејзината меморија од минатото, внатрешната реалност и искуството на светот околу неа. Посетителите имаа единствена можност да се препуштат на сетилното искуство и да навлезат во светот на боите, зборовите и звуците, сведочејќи како линиите од сликите се влеваат во стихови, а звуците на музиката добиваат визуелна форма.
Со оваа изложба интердисциплинарната авторка Ана Илијоска Богиќ нè потсетува дека уметноста не познава граници и дека уметноста е универзален јазик кој ги поврзува луѓето и културите. Линијата на светови нè повикува да ги отвориме сите наши сетила и да се предадеме на магијата на уметничкиот израз ‒ напиша за изложбата поетесата Искра Пенева.
Ана Илијоска Богиќ – сликарка, поетеса и професорка
Пред публиката, Ана Илијоска Богиќ, по професија професорка по виолина, се претстави не само како сликарка, туку и како поетеса. Таа е авторка на четири збирки поезија и билингвална поетеса. На настанот Ана говореше авторска поезија на двата јазика – српски и македонски.
Вечерта со звук ја обои виолинистката Вероника Мона Богиќ, придружувана од Катарина Хаџи-Антиќ Татиќ на пијано.
Ана Илијоска Богиќ е родена во Охрид во уметничко семејство. Дипломирала на Музичката академија во Белград. Живее и работи во Белград. Нејзините ликовни дела биле изложени на групни изложби во Белград и Охрид. „Линиите на световите” е нејзина прва самостојна изложба, а авторката одлучила изложбата делумно да има продажен карактер и приходот да биде наменет за хуманитарни цели. За нејзините педагошки резултати е наградувана со бројни признанија. Нејзините ученици се добитници на високи награди на натпревари и настапуваат на фестивали и концерти во земјата и регионот.
На концертот на гудачкиот ансамбл Версус, кој се одржа на 16ти март 2025, публиката имаше можност да се увери во талентот на учениците од класата на проф. Илијоска Богиќ. Настапија млади музичари, во просек на возраст од десет години, со придружба на проф. Бисерка Маровиќ на пијано. Уметнички соработници на ансамблот Версус беа проф. Зоран Миленковиќ и проф. Миодраг Богиќ. Присутните уживаа во сплетот на етно мелодиите од Србија и Македонија, како и познатите композиции на композитори на класична музика.
